Першым перасек фінішную рысу прадстаўнік Чэрвеньскага вытворча-харчовага завода Вячаслаў Лаўрыновіч. Другое месца заняў Міхаіл Тарасік з раённага аддзела ўнутраных спраў, трэцяе – Андрэй Мажаеў з будаўнічага ліцэя.
У дзясятку мацнейшых таксама ўвайшлі Уладзімір Мажароўскі і Аляксей Паповіч (РАУС), Павел Крайко і Аляксей Раманюк (будаўнічы ліцэй), Павел Клындзюк (аддзел адукацыі, спорту і турызму райвыканкама), Артур Чэус (райваенкамат) і Сяргей Аўласенка (раённае аддзяленне Дэпартамента аховы).
Усе яны атрымалі ў падарунак сертыфікаты на наведванне Чэрвеньскага фізкультурна-аздараўленчага комплексу (спонсар – прадпрыемства “Нафтабітумны завод”, якое ўзначальвае Аляксандр Храмцоў). Такі ж сертыфікат уручаны жыхару Чэрвеня Генадзю Сычову. Нягледзячы на шаноўны ўзрост, ён нароўні з усімі пераадолеў дыстанцыю кросу.
За актыўны ўдзел у кросе сертыфікатамі на наведванне музея “Прастора Хаіма Суціна” ў Смілавічах заахвочаны Павел Клындзюк і Аляксандр Храмцоў, а група вучняў СШ №4 атрымала футбольныя мячы.
Уручаючы ўзнагароды, намеснік старшыні Чэрвеньскага райвыканкама Ала Шахоцька ад імя ўсіх жанчын выказала словы павагі і захаплення мужчынамі, якія падтрымалі гэтую своеасаблівую акцыю, паказалі свае моц і волю ў няпростых умовах надвор’я.
Ігар АДАМОВІЧ. Фота аўтара